اَللّٰہُ الصَّمَدکے کمالات

حضرت مولانا مفتی عبدالحمید رحمة اللہ علیہ کے صاحبزادے کی اچانک اورجوانی کی وفات سے ان کے شاگرد احباب کے علاوہ ان کے والد محترم شدید صدمے سے دوچار ہوئے جبکہ ان کے چاروں بچے بہت چھوٹے تھے‘ بچوں کی صحت اور تربیت کے متعلق مفتی صاحب بہت پریشان تھے۔قاری رشید صاحب میرے بھائی کے استاد محترم تھے ہمارے اور ان کے گھروالوں کے آپس میں تعلقات تھے۔

مفتی عبدالحمید صاحب بڑھاپے اور بیماری میں اپنے چھوٹے بیٹے قاری عبدالوحید کے ساتھ بیت اللہ تشریف لے گئے اور اللہ تعالیٰ سے رو رو کر اپنے پوتے پوتیوں کیلئے دعائیں کیں اور پاکستان آکر ذکر اذکار اور وظائف کا خصوصی اہتمام کیا جن میں میں اور میری والدہ شریک ہوئی تھیں۔ اَللّٰہُ الصَّمَد کا وظیفہ شروع کیا۔ 5 عورتیں اور 5 مرد حضرات ہوتے اور روزانہ ایک لاکھ ہوتا‘ دس دن میں مکمل کرتے‘ لاکھوں کی تعداد میں یہ وظیفہ پڑھا۔ پھر اللہ تعالیٰ نے اپنے نام کی برکت سے ان کے دل کی دعا قبول کی اور بچوں کی زندگی نکھرتی اور سنورتی چلی گئی۔بڑا بیٹا ماشاءاللہ حافظ عالم بنا‘ دونوں بیٹیاں بھی حافظہ عالمہ‘ خوشحال گھرانوں میں نیک سگھڑ‘ سعادت مند‘ بیویاں اور بہوئیں ہیں۔ اللہ تعالیٰ نے مفتی صاحب کی دعائوں اور وظائف کو قبول کیا۔ یہ اتنی بڑی تبدیلی ایک معجزہ تھی۔

بلڈکینسر سے یقینی نجات ملی

قاری یونس صاحب میرے بھائی کے دوست اور لاہور صدر میں ایک مسجد میں خطیب اور امام ہیں۔ ڈیڑھ سال قبل ان کے جوان سال بھائی کو بلڈکینسر ہوگیا۔ مرض آخری سٹیج پر تھا۔ لاہور اور اسلام آباد کے تمام بڑے ہسپتالوں نے انہیں لاعلاج قراردے دیا۔ مگر قاری صاحب نے ہمت نہیں ہاری‘ بڑے بڑے علماءکرام کی خدمت میں اپنے بھائی کو لے کر جاتے دعا کرواتے‘ دم کراتے۔ نیک اللہ والوں کی دعائوں سے مختلف دیسی علاج کرواتے ہوئے کچھ افاقہ ہوا پھر ڈاکٹرز سے رجوع کیا۔ ڈاکٹرز نے 20 لاکھ آپریشن کا مانگا۔ قاری صاحب انتہائی درویش صفت اور سفید پوش انسان تھے‘ اتنا پیسہ ان کے بس سے باہر تھا۔ مگر ہر لمحہ انہوں نے اللہ ہی سے مانگا‘ بالکل بھکاری بن کر۔ اللہ تعالیٰ نے غیب سے ان کی مدد کی اور پھر کامیاب آپریشن اور کامیاب علاج کے بعد آج الحمدللہ وہ صحت مند ہیں اور یہ ساری کرامات اللہ الصمد وظیفے کی ہیں۔ انہوں نے سوا کروڑ دفعہ یہ وظیفہ پڑھا۔ میں اس واقعہ کی چشم دید گواہ ہوں۔

 درود تنجینا کے کمالات

میری دوست شیرزادی بشارت نے انہیں یہ وظیفہ بیٹے کیلئے دیا اور اللہ تعالیٰ نے انہیں بیٹے کی نعمت سے نوازا۔ چودہ سال میں میرے سامنے انہوں نے جس جس عورت کو بھی یہ وظیفہ پڑھنے کیلئے دیا اللہ نے سب کو بیٹوں سے نوازا۔ یہ درود تنجینا کا عمل ہے۔ حمل کے دن اوپر ہوں‘ پریگینسی ٹیسٹ کروانے کے آدھ گھنٹے کے بعد بھی پڑھائی شروع کروادیں۔ پانچ خواتین مقررہ ٹائم میں تین دن تک روزانہ ایک ہزار مرتبہ پڑھیں جو خواتین پہلے دن پڑھیں گی وہ متواتر پابندی سے تین دن پڑھیں گی۔

درود تنجینا سے عزت بچ گئی

میری والدہ کے چچا زاد بھائی پر بینک غبن کیس بن گیا۔ ان کے بچنے کی کوئی صورت نظر نہیں آرہی تھی۔ بینک منیجر جو ملوث تھا وہ بھاگ گیا۔ انتہائی پریشان کن حالات تھے۔ گھر کے بڑوں‘ بچوں نے نہایت توجہ اور فکر سے درود تنجینا ہزاروں کی تعداد میں پڑھا اور اللہ تعالیٰ نے عزت کے ساتھ بغیر رسوائی کے اس کیس سے نجات دلادی۔

درود تنجینا سے ویزہ لگ گیا

میرے چھوٹے چچا جنہوں نے انگلینڈ میں ہی شادی کی اور ایک بیٹے کے باپ بنے تو ان کا ویزہ ایکسپائر ہوگیا۔ گورنمنٹ نے پاکستان واپس بھیج دیا‘ ان کی اہلیہ نے اپیل کی مگر نامنظور ہوگئی‘ میرا آنکھوں دیکھا حال ہے کہ انہوں نے اللہ کے در کا بھکاری بن کر صبح‘ دوپہر‘ شام بس ایک ہی دھن میں درود تنجینا پڑھا اور ان کا ویزہ لگ گیا۔ انگلینڈ میں اب بھی انہیں کوئی مشکل نوکری کی طرف سے یا بچوں کے مسائل ہوں تو وہ فوراً درود تنجینا کا اہتمام کرتے اور کرواتے ہیں اور تمام مسائل حل ہوجاتے ہیں۔