محترم حضرت حکیم صاحب السلام علیکم! اللہ پاک آپ اور آپ کی نسلوں کو لمبی عمر برکت صحت والی عطا کرے اللہ پاک آپ کے تسبیح خانہ کو اصلاح کا ذریعہ بنائے رکھے آمین۔ 5 دسمبر 2016 ء کو آپ کی طرف سے وظیفہ ملا تھا سورئہ قریش 313بار صبح وشام پڑھنی تھی جو ہماری والدہ نے پڑھی اور ہمارا مسئلہ حل ہوگیا۔ آپ کو خط میں جو مسئلہ لکھاتھا وہ یہ تھا کہ ہماراتین بہنوںکا اکلوتا بھائی جو کہ بہت زیادہ منت ومرادوں کے بعد اللہ کریم نے ہمیں عطا فرمایا تھا بہت زیادہ بگڑ ہوا تھا۔ جیسے ہی ساتویں جماعت تک پہنچا سکول سے بھاگنے لگا والدین کا شوق تھا کہ یہ حفظ ضرور کرے‘ جب قرآن حفظ پر ڈالا تو وہاںسے بھی بھاگ کھڑا ہوا۔بس پھر ایک نیا سلسلہ چل نکلا‘ روزانہ کوئی نہ کوئی شکایت گھر آتی‘ پہلے پورا محلہ پھر علاقہ تنگ آگیا۔ پھر زندگی کے ہر میدان میںناکام رہا۔ تمام بہنیں اور والدین پہلے ہی پریشان تھے کہ اس نے ایک اور کارنامہ سرانجام دے دیا‘ علاقہ کے بااثر گھر کی لڑکی بھگا کرلے گیا اور اس سے کورٹ میرج کرلی۔ وہ بااثر تھے‘ انہوں نے ہمارے گھر چھاپے شروع کروا دیئے‘ زندگی میں پہلی مرتبہ اپنے گھر پولیس دیکھی‘ انہوں نے ہم سے عجیب عجیب سوالات کیے‘ سینکڑوں لوگ ہمارے گھر کے باہر جمع‘
ہمیں کوس رہے تھے‘ اس وقت پر افسوس ہورہا تھا جو گڑگڑا کر مانگ کر اللہ سے اس بھائی کو مانگا تھا۔ عبقری ہم تمام بہنیں پڑھتی تھیں اسی وقت عبقری میں خط لکھا‘ جب آپ کو خط پوسٹ کررہی تھی اس وقت میرے بھائی پر لاہور میں اغوا کا مقدمہ چل رہا تھا‘ میرے والد جو کبھی تھانے کے سامنے سے بھی نہیں گزرے تھے انتہائی شریف وہ اور میرا بھائی دونوں جیل میں تھے والد پہلی پیشی پر رہا ہوگئے جبکہ بھائی کو جیل جانا پڑا پھر مقدمہ چلا اس مقدمہ کے دوران ہم نے آپ کو بھائی کے حالات لکھے آپ نے سورۂ قریش کا وظیفہ دیا تھا میں نے آپ کو اس وقت لکھا تھا کہ بھائی ہمارے ساتھ نہیں رہتا وظیفہ ہم پڑھیں گے پھر والدہ نے وظیفہ پڑھنا شروع کیا۔ آپ 28 فروری کو میری بہن کے خواب میں آئے تھے جس میں آپ نے بشارت دی کہ 90فیصد کام ہوچکا ہے آپ کے بھائی کا مقدمے والا اور زیادہ توجہ کے ساتھ وظیفہ پڑھیں۔ پھر 27 مارچ کو ہمارا بھائی مقدمہ سے بری ہوگیا آپ کی دعا اور آپ کے دیئے وظیفہ سے۔ سب حیران تھے‘ وہ بہت زیادہ بااثر ہیں اس وظیفے کی برکت سے اللہ نے سارے مصائب ختم کردئیے۔ اللہ پاک آپ کو جزائے خیر عطا کرے آپ کی قیامت تک کی نسلوں میں بھی کبھی دکھ نہ آئے۔ آمین۔ (ن۔ج، ساہیوال)