دنیا پر موجود پانی کے ذخائر میں ایک چوتھائی کا یہ ایک طرف سے پچکا ہوا گول کرہ ارض جسے ہم دنیا کا نام دیتے ہیں اور جس میں سینکڑوں قوموں نے اپنے زور بازو سے حدود بندیاں کرکے چھوٹی بڑی مملکتوں کا نام دے رکھا ہے بذات خود خدائے لایزال کا متحیر کن جیتا جاگتا لامتناہی معجزہ ہے اور پھر اس پر مستزاد دیو پیکر پہاڑ‘ سونا‘ چاندی‘ تانبہ‘ سکہ‘ لوہا وغیرہ اگلتی کانیں‘ گرم اور سرد پانی کے شفاف چشمے‘ ہرے بھرے جنگلات‘ لاتعداد اور لامحدود اقسام کے چرند اور حیوانات جو سب پکار پکار کر زبان حال سے اپنے خالق مطلق کی بے نظیر صناعی کے شاہد ہیں۔
ان مخلوقات کی سہولتوں اور ضرورتوں کیلئے کیا کیا عظیم انتظام اس منتظم اعلیٰ نے کررکھے ہیں کہ کروڑوں سالوں سے اس تسلسل میں سرمو فرق نہیں آپاتا۔ گرمی‘ سردی‘ خشکی اور تری کی کیفیات کو قائم رکھنے کیلئے چاروں موسم سرما‘ گرما‘ بہار اور خزاں بنائے مختلف اقسام کی ہوائیں چلائیں‘ بارشوں کا انتظام کیا۔
غرضیکہ انسان اپنے علم کی بے مائیگی کے باعث ابھی تک عقل کل کا احاطہ کرنے سے قاصر ہے۔ جاننا چاہیے کہ پروردگار عالم نے جہاں چار موسم ترتیب دئیے ہیں وہاں مقرر شدہ بارہ مہینوں میں مختلف تغیرات آتے رہتے ہیں جن کی وجہ سے مختلف اثرات بدن انسان پر وارد ہوتے ہیں اور ذرا سی بے احتیاطی کے نتیجہ میں مختلف بیماریاں پیدا ہوتی ہیں۔
ماہ دسمبر میں صحت کی حفاظت
دسمبر انتہائی سردی کا مہینہ شمار ہوتا ہے صاحب حیثیت حضرات نرم و گرم بستر‘ بھاری بھرکم اونی لباس اور بہترین اقسام کے سامان خوردونوش چونکہ آسانی سے فراہم کرلیتے ہیں اور اس لیے موسم سرما کی شدت ان کیلئے تکلیف دہ نہیں رہتی لیکن غریب لوگ جو اپنی مالی پریشانیوں کے باعث بمشکل پیٹ بھرتے ہیں وہی زیادہ تر اس موسم میں مختلف بیماریوں کا شکار ہوتے ہیں اس موسم کے عام امراض کھانسی‘ نزلہ‘ زکام‘ نمونیہ وغیرہ ہیں۔ حفظ ماتقدم کے طور پر سردی سے بچیں‘ کمرے میں سوتے وقت روشن دان کھلے رکھیں۔ صبح لحاف سے اٹھ کر ایک دم باہر نہ نکلیں۔ ٹھنڈا اور باسی کھانا استعمال نہ کریں۔ گرم اثرات رکھنے والی چیزیں جیسے چائے‘ کافی‘ قہوہ‘ انڈا‘ گرم دودھ‘ گوشت‘ مچھلی وغیرہ استعمال کریں۔
زیادہ بادی اور بلغم پیدا کرنے والی ٹھنڈے اثرات کی حامل چیزوں مثلاً ابلے ہوئے چاول‘ گوبھی‘ آلو‘ اروی وغیرہ سے پرہیز کریں۔ نیم گرم پانی سے غسل کریں اور گرم لباس زیب تن کریں۔ خاص طور پر پاؤں میں گرم موزے ضرور پہنیں۔
ذیل میں اس موسم کی بیماریوں کا ابتدائی علاج دیا جاتا ہے مگرمرض کی نوعیت کے لحاظ سے مقامی طبیب سے رجوع کریں تومناسب ہوگا۔
بلغمی کھانسی سے بچیں ‘ درج ذیل جوشاندہ پئیں
عناب پانچ گرام‘ سپستان 100گرام‘ گاؤ زبان 3گرام‘ بنفشہ 3گرام‘ اصل السوس 3گرام‘ پرسیوشاں 3ماشہ تین پاؤ پانی ڈال کر جوشاندہ بنالیں۔ جب دو پاؤ باقی رہ جائے اتار کر مل چھان کر چار خوراکیں بنالیں حسب ضرورت چینی ملا کر دن میں چار مرتبہ نیم گرم پی لیں ملٹھی کی گٹھی یاست ملٹھی منہ میں رکھ کر چوسیں تو گلے کی خراش بند کردیگی۔ آج کل مختلف جوشاندے مارکیٹ میں دستیاب ہیں انہیں گرم پانی یا چائے میں ملا کر بھی استعمال کیا جاسکتا ہے۔
نزلہ و زکام
مذکورہ بالا جوشاندے کا نسخہ بنا کر پئیں۔ اگر قبض کی شکایت ہو تو اسی جوشاندہ میں گل سرخ6گرام شامل کرلیں۔ ناک بند ہو تو گرم پانی کا بھپارہ(بھاپ) لیں۔
نمونیہ اور چھاتی کی تکلیف ہو تو۔۔۔۔
تلوںکے تیل کو گرم کرکے چھاتی کے تکلیف زدہ حصہ پر ملیں یا انڈے کی زردی کی مالش کریں۔ روئی کو گرم کرکے چوڑی پٹی کے ساتھ سینے پر باندھ دیں۔ مریض کو سردی سے بچانے کیلئے کمرے کو گرم رکھیں۔ کشتہ بارہ سنگھا (120ملی گرام) کی ہر تین گھنٹہ بعد ایک خوراک کھلائیں۔ ڈاکٹر حضرات بیلا ڈونا پلاسٹر بھی تکلیف والے حصہ پر لگانا مفید بتاتے ہیں۔
ہاتھ پاؤں کی جلد کا پھٹنا
نیم گرم پانی سے دھو کر ویزلین کی مالش کریں۔ شلغم ابال کر پھٹے ہوئے حصہ پر ملیں پاؤں کو جراب اور ہاتھوں کو دستانوںمیں رکھیں۔
نوٹ: سردی کے موسم میں روزانہ دو تین گھنٹے دھوپ میں بھی ضرور بیٹھنا چاہیے۔ سورج کی شعاعیں ہمارے بدن میں نہ صرف حرارت پیدا کرتی ہیں بلکہ طاقت بھی دیتی ہیں اسی کو اہل مغرب سن باتھ کہتے ہیں جو ان کے ہاں بڑا مقبول ہے۔
ماہ دسمبر میں کیا کھائیں؟؟؟
ماہ دسمبر میں خشک میوہ جات استعمال کرنا چاہیے۔ مونگ پھلی کے بارے میں عام تاثر ہے کہ اس کے کھانے سے کولیسٹرول بڑھ جاتا ہے‘ غلط ہے بلکہ مونگ پھلی خون میں کولیسٹرول کی مقدار کو کم کرتی ہے۔ مونگ پھلی کے ساتھ السی کا استعمال کیا جائے تو یہ کولیسٹرول اور ٹرائی گلیسٹرائیڈ کی مقدار کو کم کرتے ہیں۔السی میں وٹامن ای وافر مقدار میں پایا جاتا ہے۔ ان کے علاوہ شہد‘ السی‘ تل‘ کھجور‘ گڑ وغیرہ استعمال کرنا چاہیے۔ 100گرام تل میں ایک گرام کیلشیم پایا جاتا ہے۔ہم اس طرح کی خالص اور سادہ غذاؤں سے بہت سی بیماریوں سے بچ سکتے ہیں