جس قوم میں بے حیائی کھلم کھلا پھیل جائے تو اس قوم میں طاعون اور وہ بیماریاں پھیلتی ہیں کہ جو پہلے کبھی ظاہر نہ ہوئی تھیں
محمد رضوان خٹک‘ کربوغہ شریف

عبداللہ بن عمر رضی اللہ تعالیٰ عنہٗ راوی ہیں کہ رسول اللہ ﷺ مسجد میں تشریف فرما تھے۔ حضرت ابوبکر‘ عثمان غنی‘ عمر‘ علی‘ عبدالرحمٰن بن عوف‘ عبداللہ بن مسعود‘ معاذ بن جبل‘ خذیفہ بن ایمان‘ ابوسعید حدری اور میں رضوان اللہ علیہم اجمعین سب آپﷺ کی بارگاہ میں حاضر تھے کہ ایک انصاری نوجوان آیا اور سلام کرکے بیٹھ گیا اور عرض کیا کہ یارسول اللہ ﷺ سب سے بہتر مسلمان کون ہے؟ آپ ﷺ نے ارشاد فرمایا جس کے اخلاق سب سے بہتر ہیں۔ بعدازاں اس نے سوال کیا ’’کون مسلمان سب سے زیادہ ہوشیار ہے‘‘آپ ﷺ نے فرمایا جو سب سے زیادہ موت کو یاد کرنے اور موت آنے سے پہلے سب سے زیادہ موت کی تیاری کرنے والا ہو‘ ایسے ہی لوگ سب سے زیادہ ہوشیار ہیں۔انصاری نوجوان تو ساکت ہوگیا اور آپ ﷺ مجلس کی طرف متوجہ ہوئے اور فرمایا: پانچ خصلتیں نہایت خطرناک ہیں اللہ تعالیٰ تم کو ان سے پناہ دے اور ان کے دیکھنے سے محروم رکھے۔ 1۔جس قوم میں بے حیائی کھلم کھلا پھیل جائے تو اس قوم میں طاعون اور وہ بیماریاں پھیلتی ہیں کہ جو پہلے کبھی ظاہر نہ ہوئی تھیں۔2۔ جو قوم ناپ تول میں کمی کرتی ہے وہ قحط سالی اور مشقتوں میں مبتلا ہوتی ہے اور ظالم بادشاہ ان پر مسلط کیا جاتا ہے۔3۔جو قوم اپنے مال کی زکوٰۃ نہیں نکالتی اس سے بارش روک لی جاتی ہے اگر جانور نہ ہوتے تو بالکل بارش سے محروم کردئیے جاتے۔4۔ اور جو قوم اللہ عزوجل اور اس کے رسول ﷺ کا عہد توڑتی ہے تو اللہ تعالیٰ اجنبی دشمنوں کو ان پر مسلط کردیتا ہے اور وہ غیرقوم کے لوگ ان کے ہاتھ میں جو کچھ ہوتا ہے وہ سب لے لیتے ہیں۔ 5۔ اور جب پیشوا اور حکام کتاب اللہ کے خلاف فیصلہ کرنے لگیں اور متکبر اور سرکش ہوجائیں تو اللہ تعالیٰ آپس میں پھوٹ ڈال دیتے ہیں۔ (بحوالہ سیرۃ المصطفیٰ جلد دوم صفحہ 410)۔ قارئین! آج ہم اپنا محاسبہ کریں کہیں یہ پانچ خصلتیں ہم میں تو نہیں۔۔۔