فریڈرک لینگ برج انگریزی کا ایک شاعر ہے وہ 1849ء میں پیدا ہوا۔ 1923ء میں اس کی وفات ہوئی۔ اس کا ایک شعر ہے کہ رات کے وقت دو آدمی جنگلہ کے باہر دیکھتے ہیں ایک شخص کیچڑ دیکھتا ہے اور دوسرا شخص ستارہ:
Two men look out through the same bars
One see the mud, and one the stars
یہی بات ایک فارسی شاعر نے زیادہ بہتر طور پر اس طرح کہی کہ میرے اور تمہارے درمیان جو فرق ہے وہ سننے کا فرق ہے۔ ایک آواز آتی ہے تم اس کو دروازہ بند کرنے کی آواز سمجھتے ہو اور میں سمجھتا ہوں کہ وہ دروازہ کھلنے کی آواز ہے:
تفاوت است میان شنیدن من و تو
تو غلق باب و منم فتح باب می شنوم
درخت میں کاٹنے کے ساتھ پھول بھی ہوتا ہے۔ یہی حال انسانی سماج کا ہے۔ سماجی حالات بظاہر خواہ کتنے غیرموافق ہوں۔ ہمیشہ اس کے اندر موافق پہلو بھی ساتھ ساتھ موجود رہتا ہے۔ ایک شخص جو چیزوں کو صرف ظاہری طور پر دیکھنے کی نگاہ رکھتا ہو‘ وہ سطحی چیزوں کو دیکھے گا اور زیادہ گہرے پہلوؤں کو دیکھنے میں ناکام رہے گا۔ مگر جو شخص گہری نظر رکھتا ہو وہ زیادہ دور تک دیکھے گا اور ناموافق پہلو کے ساتھ موافق پہلو کو دریافت کرنے میں کامیاب ہوجائے گا۔
اس دنیا میں کیچڑ بھی ہے اور یہاں ستارے بھی ہیں‘ یہ دیکھنے کی بات ہے کہ کون شخص کس چیز کو دیکھتا ہے اور کون شخص کس چیز کو۔ ایک ہی آواز ہے۔ مگر نادان آدمی اس کو دیکھ کر یہ سمجھ لیتا ہے کہ دروازہ بند ہوگیا اور دانش مند آدمی سمجھتا ہے کہ دروازہ اس کیلئے کھول دیا گیا ہے۔ تمام مسائل ہمیشہ ذہن میں پیدا ہوتے ہیں اور ذہن کے اندر ہی ان کو ختم کیا جاسکتا ہے‘ بشرطیکہ آدمی کے اندر صحیح سوچ کا مادہ پیدا ہوجائے۔
حقیقت یہ ہے کہ یہ دنیا عقل کا امتحان ہے‘ جو شخص اپنی عقل کو استعمال کریگا وہ اپنے لیے راستہ پالے گا اور جو شخص عقل کو استعمال نہیں کریگا اس کیلئے بربادی کے سوا کوئی انجام مقدر نہیں۔سمندر میں موجوں کے تھپیڑے ہیں جو شخص سمندر میں اپنی کشتی چلانا چاہے وہ مجبور ہے کہ موج اور طوفان کا مقابلہ کرتے ہوئے اپنی کشتی مطلوبہ منزل کی طرف لے جائے۔