جمعرات کے درس کے بعد ہونیوالی مجالس مجذوبی کی محفل میں عوام کے بنائے گئے اعمال کے حیرت انگیز مشاہدات

برکت والی تھیلی اورذکر میں برکت: حضرت جی ! جو وظیفہ آپ نے دیا تھا وہ مجھ سے پڑھا نہیں جاتا تھا رات کو پڑھتے ہوئے نیند آجاتی تھی اور تسبیح ہاتھ سے گر جاتی تھی اور سو جاتا تھا۔ میں نے برکت والی تھیلی میں 500کھجور کی گٹھلیاںسورۂ کوثر پڑھ کر رکھ لیں اور جب ذکر کرنے لگتا تھا تو برکت والی تھیلی میں سے سورۂ کوثر پڑھ کر نکالتا اور ذکر کر کے تھیلی میں ڈالتا جاتا ہوں ۔اب اس عمل سے اتنی برکت ہو گئی ہے کہ 2000 مرتبہ وظیفہ کر لیتاہوں ،اس سے قبل 100 مرتبہ بھی نہیں پڑھا جاتا تھا۔(جنید الرحمن)
(حضرت جی: نے فرمایا کہ اللہ کو اتنا بولو‘ اتنا سنو‘ اور اتنا سوچو کہ وہ ہمارے من میں ،ہمارے انگ انگ میں اتر جائے ، ہماری ہر دفعہ جو مجلس لگتی ہے وہ اس چیز کے بارے ہوتی ہے کہ عمل کا نفع ہر بندہ اپنے مشاہدات تجربات بتاتاہے،میںنے فلاں عمل کی برکت کا مشاہدہ اورتجربہ کیا اب ایسا شخص سعادت سمجھ کر بتائے ۔ عمل کی سعادت تو حاصل کی پھر اس کی برکت کا مشاہدہ بھی ہوا اب دیکھنا یہ ہے اس کی برکت کا مجھے کیا فائدہ ہوا ہے۔
منہ کے چھالوں سے شفاء:ایک صاحب روزنامہ جنگ میں کام کرتے ہیں فرمانے لگے کہ گزشتہ جمعرات درس میں وضو کے بعد تین گھونٹ پانی پینے سے شفا والا عمل سنا تھا میری زبان اور منہ کے اندر چھالے نکل آتے تھے، جو بہت تکلیف دیتے تھے، میں سومو جل استعمال کرتا تھا ،پچھلی جمعرات جب مجھے پتہ چلا تو اگلے روز میری زبان پر چھالا نکل آیا میںنے عصر کے وقت وضو کیا اور تین گھونٹ پانی پیئے۔ پہلے گھونٹ پر’’اللہ شافی‘‘ دوسرے گھونٹ پر ’’اللہ معافی‘‘اور تیسرے گھونٹ پر ’’اللہ کافی‘‘ پڑھ کر پی لیا ،مغرب تک میرا منہ اور زبان چھالے سے صاف ہو گئے۔