محترم حضرت حکیم صاحب السلام علیکم! گزشتہ چند سالوں سے مجھے برص (پھلبہری) کا مرض لاحق ہوا‘ جو بڑھتے بڑھتے جسم کے 90فیصد حصہ پر پھیل چکا‘ صرف چہرہ بچا ہوا ہے۔ پچھلے دنوں مجھے ایک نوجوان ملا جو کہ اس مرض میں مبتلا تھا‘ اس نے کہا کہ میں علاج کراکر تھک گیا پھر کسی نے مجھے کچھ آیات جنہیں ’’منزل‘‘ کہا جاتا ہے وہ پڑھنے کو کہا‘ میں نے بازار سے ’’منزل‘‘ کےنام سے کتابچہ خریدا اور اس میں موجود آیات روزانہ صبح ایک مرتبہ پڑھنا شروع کیا اور آج تقریباً ایک سال کے اندر اندر میرا 75 فیصد برص مٹ چکا ہے۔ چہرہ، گردن وغیرہ بالکل صاف ستھرے ہوگئے ہیں اور میں کوئی دوائی بھی نہیں لے رہا۔ اس نے مجھے بھی (منزل) آیات پڑھنے کا مشورہ دیا۔ اس کے مشورے پر روزانہ ایک مرتبہ پڑھنا شروع کیا صرف ایک ہفتہ کے اندر اندر میرے برص کے داغ کنٹرول ہونا شروع ہوگئے۔ اس کے علاوہ مجھے دو اور ایسے لوگ ملے جنہوں نے بتایا کہ ان کا برص (منزل) پڑھنے سے ختم ہوگیا ہے۔ اس لیے میرا دل بھی اب مطمئن ہے کہ یہ مرض اسی روحانی علاج سے ٹھیک ہوگا کیونکہ دوائیاں کھا کھا کر بہت سارے مزید مسائل بن گئے ہیں۔ (آصف محمود‘ چکوال)