چہرے کی چھائیوں کیلئے: چہرے پر چھائیاں عموماً خون کی کمی سے بھی پڑتی ہیں۔ چھائیوں کیلئے ایک بڑا ہی سادہ اور آسان ٹوٹکہ ہے یوں کریں کہ کوئی خالی شیشی لیں اور اسے اچھی طرح دھو کر خشک کر لیجئے۔ اب اس میں آدھی شیشی تازہ مکھن ڈالیے اور ایک ٹکیہ مشک کافور ہاتھ سے مسل کر ملا دیجئے۔ منہ دھو کر صبح شام یہ مکھن لگائیے۔یاد رکھیں کہ بیسن سے منہ دھونا ہے کسی صابن سے نہیں۔علاوہ ازیں مالٹے، کینو کے چھلکے پیس کر ہفتہ میں دوبار چہرے پر لگائیے۔ دودھ، دہی اور تازہ چھاچھ کا استعمال زیادہ کیجئے۔کچے پکے شلجم اور گاجریں خوب کھائیے اور قبض نہ ہونے دیں، انشاءاللہ آپ کی صحت آہستہ آہستہ بہتر ہو جائے گی۔دھوپ میں زیادہ دیر کام نہ کیجئے،دھوپ کی وجہ سے بھی چہرہ سنولا جاتا ہے۔ دھوپ میں کام کرنا پڑے تو سر اچھی طرح چادر سے ڈھانپ لیجئے تاکہ براہ راست دھوپ چہرے پر نہ پڑے۔ علاوہ ازیں اپنی خوراک کا خیال رکھیے۔ مصالحے دار، تلی ہوئی اشیاءاور گوشت وغیرہ سے مکمل اجتناب کریں۔ تاز ہ سبزیاں اور پھل اپنی غذا میں شامل کیجئے۔گرتے بالوں کیلئے: چقندر منگوائیے مگر وہ پتوں کے ساتھ ہوں۔ دو تین چقندر کے پتے لے کر موٹے کاٹ لیجئے،انہیں ایک کلو پانی میں اچھی طرح جوش دیجئے۔ پھر اتار کر رکھ لیجئے۔ روزانہ یہ پانی سر میں لگائیے اور پانچ دس منٹ بعد سر دھولیں۔ تلوں کا تیل یا کھوپرے کا تیل منگائیے اس میں چقندر کے قتلے کاٹ کر خوب گرم کیجئے۔ جب چقندر سیاہ ہو جائیں تو اتار کر ٹھنڈا کرکے چھانیئے۔ ہفتے میں دو بار یہ تیل رات کو سر پر لگائیے۔ صبح بال دھولیجئے اور پھر چقندر کے پتوں کے پانی سے سر دھو کر خشک کر لیجئے اگر آپ کے پاس وقت ہے تو دن میں دوبار پتوں کے پانی سے سر دھوئیے۔ اس کے بعد سادہ پانی سر میں نہ ڈالیے۔
مزید گھریلو ٹوٹکوں سے بیماریوں اور پریشانیوں کاعلاج جاننے کیلئے ’’خواتین کے مسائل اور بڑی بوڑھیوں کے ٹوٹکے‘‘ کتاب کا مطالعہ کریں