ماہنامہ عبقری - اپریل 2009ء

ایک روایت میں آنحضرت صلی اللہ علیہ وسلم نے ارشاد فرمایا: ”مَن کَظَمَ غَیظًا وَ ھُوَ قَادِر عَلٰی اَن یُنَفِّذَہ دَعَاہُ اللّٰہُ عَلٰی رُوُوسِ الخَلَایِقِ یَومَ القِیَامَہ حتّٰی یُخَیِّرَہُ مِن اَیِّ حُورِشَائَ“ (شعب الایمان: 313/6) جو شخص باوجود غصہ کے دوسرے پر قدرت رکھتا ہو اس کے باوجود غصہ کو پی جائے تو اللہ تعالیٰ اسے قیامت کے دن تمام مخلوقات کے سامنے بلائے گا اور اسے اختیار دے گا کہ جنت کی جس حور کو چاہے پسند کر لے۔“ ایک اور حدیث میں جناب رسول اللہ صلی اللہ علیہ وسلم نے ارشاد فرمایا: ”مَا جَرَعَ عَبد جَرعِہً اَعظَمَ اَجرًا عِندَ اللّٰہِ مِن جَرعَہِ غَیظٍ کَظَمَھَا ابتِغَائَ وَجہِ اللّٰہِ عَزَّوَجَلَّ“ (شعب الایمان: 314/6) ترجمہ : ”اللہ کے نزدیک اجر و ثواب کے اعتبار سے سب سے زیادہ عظمت والا گھونٹ وہ غصہ کا گھونٹ ہے جسے محض رضائے خداوندی کی نیت سے انسان پی جائے گا۔“ حقیقت یہ ہے کہ غصہ کو پی جانا اور مخاطب کو معاف کر دینا اعلیٰ درجہ کا کمال ہے۔ حضرت عمر بن عبدالعزیز رحمتہ اللہ علیہ فرماتے ہیں کہ اللہ کے نزدیک انتہائی پسندیدہ اعمال میں سے یہ تین اعمال ہیں۔ (1) قدرت کے باوجود معاف کر دینا (2) تیزی اور شدت میں غصہ کو قابو میں رکھنا (3) اور اللہ کے بندوں کے ساتھ نرمی اختیار کرنا۔ (شعب الایمان: 318/6) پچھلا صفحہ